Gagong Pilipino

Isa sa mga paborito kong awitin ang Pangarap ng Balahibumpooza at kung hindi pa ninyo ito napapangkinggan ay maaaring i-click ang larawan sa itaas. Ayos ba pareng Riera? Time spacewarp, ngayon na!!!

Maliban sa tila lullaby na awitin ay hinahabi ng awiting ito ang ating mga pangarap hindi lamang sa pag-ibig kungdi ang mga ninanais nating mangyari sa ating lipunan. Wala naman sigurong Pilipino na ang pangarap ay isang maunlad, mapayapa at mapangkalingang lipunan.

Pero sabi nga ni kumpareng Riera, lahat ng ito ay pangarap lang.

Nanatili at mananatiling ganito ang ating lipunan dahil sa malalim na pagkakaugat ng kultura ng korapsyon.

Wala yatang Pilipino ang hindi nakaranas ng korapsyon dito sa Pilipinas na kung saan lahat ng bagay ay nagagawan ng paraan. Opo, ang mga Pilipino ay "maparaan."

Maparaan tayo na umiwas o kung hindi man ay tahasang sumuway sa batas. Isang simpleng halimbawa nito ay ang simpleng pagsunod sa traffic light. 

Nararanasan ko ito araw-araw lalo na rito sa kanto ng Anonas St. at V. Luna St. sa Quezon City. Walang silbi ang traffic light dito.

Walang pakialam ang mga drivers at pedestrian sa kantong ito sa traffic lights, maging ang mga pulis ay patay malisya.

Minsan nga ay napagtawanan pa ako dahil hindi ako tumawid dahil naghihintay ako ng green light, gayong malayo pa ang sasakyang patawid sa kanto.

Oo nga naman, para akong gago at naghihintay ng green light gayong hindi naman ako masasagasaan kung tatawid ako dahil napakalayo pa ng sasakyang dadaan.

Gago na kung gago, pero gusto kong sumunod sa green light eh. Hindi naman ako ambulansiyang may emergency at kailangang tumawid sa red light para makapagsalba ng buhay.

Pero ang nakakatuwa nitong Lunes ay inilunsad ang Mabuting Pilipino Movement na naglalayong tugunan ang kultura ng korapsyon sa ating bansa at himukin ang mga Pinoy na sumunod sa batas, simpleng batas man ito tulad ng pagsunod sa traffic lights hanggang sa pagbabayad ng buwis at pagtayo para sa karapatan ng bawat Pilipino.

Ah, ang sarap. Hindi pala ako nag-iisang gago sa bansang ito.

Gago rin palang tulad ko si Noel Cabangon, ang convenor ng movement, na gustong makita na ang bawat Pilipino ay hindi lamang handang bumatikos kungdi handa ring sumunod sa mga nilalayon ng batas.

Sabi nga ni Noel sa kanyang awiting Mabuting Pilipino,

Ako’y isang mabuting Pilipino
Minamahal ko ang bayan ko
Tinutupad ko ang aking mga tungkulin
Sinusunod ko ang kanyang mga alituntunin

Tumatawid ako sa tamang tawiran
Sumasakay ako sa tamang sakayan
Pumipila at ‘di nakikipag-unahan
At ‘di ako pasiga-siga sa lansangan

Ngayon ko naisip, si Merceditas Gutierrez ba ay sumusunod sa traffic lights. Eh si Gloria Macapagal-Arroyo? Naturuan kaya niya ang mga anak niyang sina Mikee at Datu na sumunod sa tamang tawiran? At ang kanyang asawang si Atty. Mike, sumusunod ba siya sa batas trapiko?

Naitanong ko ito dahil kung natuto silang sumunod sa simpleng batas trapiko, sa tingin ko ay mangingimi silang bumali sa ibang batas. 

Dagdag nga ni Noel sa kanyang awit:

Ako’y isang tapat at totoong lingkod ng bayan
Pabor o lagay ay ‘di ko pinapayagan
Tapat ang serbisyo ko sa mamamayan
‘Di ko ibinubulsa ang pera ng bayan

Punto ni Noel kung tatapusin natin ang kanyang awitin:

Ipinagtatanggol ko ang mamamayang Pilipino
Mga karapatan nila’y kinikilala ko
Iginagalang ko ang aking kapwa tao
Ipinaglalaban ko ang dangal ng bayan ko.

Ikaw, gago, este, Mabuting Pilipino ka ba?

Marcoses

Iba't ibang kapamaraanan ang gagawaing paggunita sa ika-25 anibersaryo ng People Power revolt. Makulay at malawak ang gaganaping pagdiriwang lalupa't anak ng Edsa uprising icon na si Cory Aquino ang nakaupo ngayon bilang pangulo.

Siyempre nais ni Noynoy na maipagdiwang ang legacy ng kanyang yumaong ina.

Pero sa pagdiriwang sa taong ito at sa mga nakaraang taon, may nalilimutan ang taumbayan.

Oo ang Edsa ngayon ay itinuturing na simbolo ng demokrasya, pagkakaisa ng mamayang Pilipino at pagbabago. Pero huwag nating kalimutan na ang Edsa ay simbolo rin ng lahat ng karumaldumal na ginawa ng mga Marcoses.

Ang Edsa ay simbolo ng pag-aaklas laban sa diktadura, korapsyon, panunupil sa karapatang pangtao at kaganidan ng mga Marcoses.

Huwag nating kalimutan na kaya nag-alsa ang taumbayan ay dahil hindi na nito masikmura ang pambubusabos na ginawa nina Makoy at Meldy sa taumbayan.

Ilang libong Pilipino ang namatay dahil nilabanan ang diktadura ni Marcos. Ilang libong Pilipino ang namatay dahil sa hindi makataong pamamalakad ng diktadura.

Ilang bilyong piso ang ninakaw ni Marcos, ng kanyang pamilya at ng kanyang mga alipores sa kaban ng bayan. Tandaan natin na ang trilyong pisong inutang ng mga Marcoses ay binabayaran pa natin at babayaran pa ng mga susunod na henerasyon.

At lalong wag nating kalimutan na nagawa lahat ito ni Marcos dahl sa tulong ng Estados Unidos.

Oo, kakutsaba ni Marcos ang Estados Unidos sa kanyang mapanupil na diktadura. Ang Estados Unidos ang nag-armas sa militar na ginamit ni Marcos upang supilin ang mga bumabatikos at lumalaban sa kanyang diktadura.

Ang Estados Unidos, sa pagnanais nitong mapanatili ang base militar nila dito sa Pilipinas at mabantayan ang kanilang interes sa Asya at Pasipiko, ang kumalinga at nagbigay buhay sa diktadura ng mga Marcoses.

Kaya't hindi masasabing hindi pa tapos ang Edsa Revolution. Ito ay isang chapter lamang sa paghahangad ng mga Pilipino na magkaroon ng tunay na bansang kakalinga sa kanyang mamamayan.

Isang bayang may pamahalaang hindi kumakatig sa interest ng ibang bansa kungdi sa interes ng mga mamamayan nito.

Kaya't sariwain natin ang Edsa revolution at huwag kalimutang, hindi pa tapos ang laban.

UST professor

 

Click the pix to read the news article about UST profesor

Mag-aaral ng Uste ang anak ko, kaya noong lumabas ang balitang may isang propesor sa UST na nagbibigay ng extra credit kung magpo-post ang mga istudyante niya ng kanilang "opinyon" ukol sa pamaimigay ng Akbayan Party ng condom noong Valentine's day sa facebook account ng partido, nabahala ako.

Tinanong ko agad ang anak ko kung totoo ito dahil nang bisitahin ko ang facebook account ng Akbayan, napansin kong hindi naman masasabing opinyon ng istudyante ang nakalagay doon kungdi opinyon ng kanilang guro at ang mga istudyante ay tipong nag-post lamang ng kanilang opinyon upang makakuha ng additional credit.

Marami akong kaibigang nagtapos sa UST, na karamihan ay nagtapos ng journalism habang ang iba ay nagtapos sa iba't ibang kolehiyo ng nabanggit na paaralan.

May mga pinsan ako na nagsipagtapos din sa nasabing paaralan. Maayos na paaralan ang UST, katunay sa unibersidad na ito nagtapos ang ate ko ng BS Math.

Sabi nga ni Thomas Aquinas: There is nothing on this earth more to be prized than true friendship.

St. Thomas Aquinas

Pero dahil kay Institute of Religion professor Aguedo Florence Jalin mukhang masisira ang anumang magandang imaheng binuo ng paaralan sa nakaraang 400 taon.

Ayon sa sulat ni Jalin na kanyang ipinoste sa Akbyan youth website sinabi niyang hindi ill-informed opinion ang ipinoste ng kanyang mga istudyante kung nagpapakita lamang ng magkakasing-ayong pananaw.

Pero kung babasahing mabuti ang isinulat ng mga istudyante para itong naka-template dahil parepareho ang ginamit na mga pananalita. Matatawag bang consistent dahil naka-template?


Sinabi ni Jalin na ang usapin ay moralidad kaya niya inutusan ang mga istudyante na mag-post ng kanilang opinyon sa Akbayan Party facebook fan page kapalit ng extra credit?

Ang tanong ko lang ay puwede bang tawaging panunuhol sa kanyang mga istudyante ang pagbibigay ng extra credit kapag nag-post sa Akbayan Party facebook fan page?

Isa pang tanong, magpo-post ba ang mga istudyante ng kanilang "opinion" kung walang extra credit mula kay Jalin?

Imoral ba ang panunuhol? Ayon kay Jalin, hindi ito panunuhol kungdi isang insentibo, kayo ang humusga.

Kung imoral ang panunuhol, samakatuwid ay nagkasala si Jalin at dapat siyang mangumpisal upang mabigyan ng communion dahil ayon sa katuruang Katoliko, hindi puwedeng mag-communion kung hindi nakapangumpisal.

Sabi nga ni Thomas Aquinas: Clearly the person who accepts the Church as an infallible guide will believe whatever the Church teaches.

Sinabi rin ni Jalin sa kanyang sulat sa Akbayan Youth na sa daigding na akademiya, hinuhubog nila at sinasala ang kaalamang ipinapaabot sa mga istudyante. Ang guro ba ang dapat magpasiya kung ano ang tama at ano ang mali?

Ito ang problema sa akademiya lalo na yong mga religious academe, palaging wala sa realidad ang mga etika na itinuturo sa mga istudyante. Totoo na dapat ay may moral foundation ang mga istudyante ngunit dapat ito ay nakabase sa konteksto ng realidad at hindi ng mga kuro-kuro lamang.

Sabi nga ni Thomas Aquinas: "Distinctions drawn by the mind are not necessarily equivalent to distinctions in reality."

Pero ang mas nakakapanindig balahibo sa isinulat ni Jalin ay ang kanyang pag-iwas sa debate. Matapos niyang ibala sa kanyon kanyang mga istudyante at ipagawa sa kanila ang dapat na si Jalin mismo ang gumagawa ay tumalikod siya sa hamon ng Akbayan Youth.

Sabi nga ni Thomas Aquinas: The highest manifestation of life consists in this: that a being governs its own actions. A thing which is always subject to the direction of another is somewhat of a dead thing.

Wala lang.

Sabi nga ni Thomas Aquinas: Most men seem to live according to sense rather than reason.

Gen. Limot este Gen. Ligot

I-klik ang pix upang mapanood kung paano nakalimot si Gen. Ligot

Nakakasira ng araw.

Ganito ang dating sa aking ng pagnanakaw ng mga heneral sa kaban ng bayan na inilagak sa sandatahang lakas ng Pilipinas.

Habang ang maraming Pilipino ay isang kahig isang tuka ang kalagayan, narito ang mga heneral at ginagawang gatasan ang Armed Forces of the Philippines.

Matapos mabuking ang "pasalubong at pabaon" ng mga heneral, lumabas naman pangungurakot ni AFP competroller Jacinto Ligot, na pumalit kay Gen. Carlos Garcia.

At tulad ng kaniyang pinalitan, hindi napigil ni Ligot na isawsaw ang mga daliri sa kaban ng bayan at tsumani ng ilang milyong piso.

Ang kaibahan lang ay mas malaki pa ang natsani ni Ligot kaysa kay Garcia. 

Lumalabas na may mahigit P700 milyon si Ligot sa bangko na hindi niya maipaliwanag kung saan nagmula.

Ang yaman di ba?!

Sana nag-PMA na rin ako para may tsansang maging multi-millionaire. Ngayon kasi ang tsansa ko na lang na yumaman at magkalimpak limpak na pera ay manalo sa lotto. Pero ang tsansa kong manalo ay tulad ng laki ng pera ni Ligot. One in a billion ika nga.

Sa isang banda, nagdadalawang isip din ako kung gusto kong matapatan ang yaman ni Ligot o ni Garcia, o maging ni Gen. Reyes, na kamakailan ay nagpakamatay.

Napansin ko kasing si Ligot at naging malilimutin. Si Garcia ay tila naging parrot. At si Reyes? Alam naman natin kung ano ang ginawa ng dating chief of staff.

Ang tawag nga ngayon kay Ligot ay Ligot Kalimot, at kay Garcia ay parrot dahil wala siyang masagot sa Senate hearing kungdi ang mga katagang, "I invoke my right against self-incrimination."

At siyempre, ayoko pang mamatay. O tulad ni Reyes na nagpakamatay.

Naisip ko tuloy, tataya pa ba ako sa lotto. Ayaw ko kasing maging Ligot Kalimot o Garcia the Parrot. At ang mas ayokong maging black rose tulad ni Reyes.

Wala lang.