Magulang

Ka-chat ko kahapon ang isang barkada na sa ngayon ay Cebu-based na. Nagawi ang usapan kay Ombudsman Merceditas Gutierrez at naitanong niya kung bakit napakakapal ng mukha ni Merci.

Narito ang text ng chat namin: 

Barkada ko: Tol bakit ang kapal ng mukha ni Mercy? 

Ako: Ganun siya pinalaki ng magulang niya

Barkada ko: Si Gloria at Mike siguro magulang nya kaya ganun kakapal mukha nila

Ako: hahaha

Barkada ko: Tiyuhin niya sila Ligot, Garcia at si Suicide Boy, hehehe 

Ako: Suicide boy...ayuz...creative ka talaga 

Barkada ko: SLN tol,  SLN. RIP.

Totoong tayo ay produkto ng ating mga magulang. Hindi lamang ang ating pisikal na pangangatawan kungdi maging ang ating pag-uugali, pag-iisip at pananalita.

Kaya nga kapag may nilalait tayo at minumura ay sinisigawan nating Putang Ina Mo.

Getty Image

Malaki rin ang impluwensiya ng ating mga magulang sa ating pagkatao at ganoon din ang ating mga kaibigan. Kaya nga ang kasabihan ay sabihin mo sa akin kung sino ang mga kaibigan mo at sasabihin ko kung sino ka.

Kaya't hindi maikakaila na lahat halos ng naging kaalyado ni GMA noong siya ay pangulo pa ay nadawit sa iskandalo. Ikaw ba naman ang magkaroon ng iskandalosang presidente eh. Malamang maiskandalo pati gabinete.

Balik tayo sa usapan ng magulang.

Maraming nagsasabi na kung naitanim ng mga magulang natin ang mabuting asal sa ating pag-iisip, lalu na ng ating mga ina,  malaki ang tsansa na dadalhin natin ito saang larangan man tayo pumasok.

Kaya't malaki ang katanungan kung naisaksak ba ng erpat at ermat ni GMA at Merci ang mabuting asal sa kanila, na napakahalaga sa pagsisilbi sa mamamayan lalupa't sila ay nalagay sa pamamahala ng ating bansa.

Malamang hindi yong mga erpat at ermat nila ang mas may malaking impluwensiya sa kanila kungdi ang mga kanilang mga kaibigan o mga kasama sa buhay.

Ngayon sumaksak sa isipan ko kung bakit nagpakamatay si dating Gen. Angelo Reyes sa harapan ng puntod ng kanyang ina.

Nagpatiwakal siya dahil nahihiya na siya sa kanyang ina. Isipin mo nga naman nadawit ang pangalan ng buong pamilya. Nalusaw pa ang pangarap ng kanyang ina para sa kanyang pinakamamahal na anak.

Anuman ang dahilan, may isang hindi naituro ang kanyang ina, ito ay ang katapangan na harapin ang bunga ng ating mga aksyon. Tanggapin na kung may pagkakamali, may pagtatama.

Isa ito sa dapat matutunan ni GMA, Merci at iba pa nilang kakosa sa hinaharap. Ma-eErap din kayo!!!

 

Merceditas

Isa sa mga Merceditas na kilala ko ay si Merceditas Valdés (1928-1996), isang Cuban singer na ipinanganak sa Cayo Hueso sa Havana noong 14th October 1928.

At kabaliktaran ng isa pang Merceditas na kilala ko, itong si Valdes ay itinuturing na haligi ng musika sa Cuba.

Katunayan, si Valdes ay naging bahagi ng pagbabago sa Cuba, kung saan nakasama siya sa mga artistang sumuporta sa pagbabagong inihatid ni Fidel Castro.

 Kasama pa nga si Valdes, kilala sa kanyang Afro-Cuban style na mga awitin, sa isang compilation ng mga awitin para sa Cuban revolucion. Maliban sa compilation na ito ay bumuo rin sariling albums si Valdes na hinangaan noong kanyang kapanahunan.

Ngunit ang isa pang Merceditas na kilala ko ay ang pinakamalaking kabaliktaran ni Valdes.

 Siya ay si Merceditas Gutierrez, kaibigan at kaklase ni dating first gentleman Mike Arroyo, na siya namang asawa ni dating pangulong Gloria Macapagal Arroyo.

Kahapon ay tinanguan ng Committee on Justice ng House of  Representatives ang impeachment case laban kay Gutierrez at malamang na sa susunod na linggo, sa Lunes o Martes, ay bubusisin na ng plenaryo ang kasong kinakaharap ni Gutierrez at pagbobotohan upang isumite ito sa Senado.

Katulad ni Valdes, malamang na mapasama sa kasaysayan si Gutierrez, hindi nga lamang bilang tinitingalang bituing tulad ni Valdes kungdi ang kauna-unahang Ombudsman ng bansa na mai-impeach.



At kung saka-sakaling ma-impeach si Gutierrez, siya ay malamang na tugisin para sa mga kalapastanganang nagawa sa taumbayan, laluna ang kanyang paghadlang sa pagtugis sa mga kaalyadong sina Gloria, Mike at kanilang mga alipores sa loob ng militar, pulis, maging sina Jocjoc Bolantes at marami pang iba.

Kay ganda di ba?

Ngunit hindi pa tapos ang laban sakaling ma-impeach si Merci.

Ang kasunod kasi nito ay ang pagpili sa papalit sa kanya.

Kinakailangang walang papanigan, walang titingalain, walang pipiliing aasuntuhin ang bagong Ombudsman.

At dahil dito, kainakailangang bantayan ng taumbayan hindi lamang ang impeachment proceeding laban kay Merceditas, kungdi sa sinumang papalit sa kanya.

Kung hindi mangyayari ito, malamang mapunta sa wala ang lahat ng pagkilos laban kay Merceditas at sa hulihan ay wala na namang mapapala ang taumbayan.

Text blast

"It is unfortunate that VP Binay's effort to talk to Saudi govt about condition of our ofws has been sabotaged by the ill-informed report of Akbayan Cong. Walden Bello.  Akala ko ba kakampi kayo ni Pnoy?  Bkit nyo sinisira  ang relasyon ng Pinas at saudi at nilalagay sa alanganin ang hanapbuhay ng mga kababayan natin sa saudi." 

Tatlong beses akong nakatanggap ng text message nitong nakaraang linggo mula sa cellphone numbers 09177654158, 092772526015 at sa 09189999999.

Ang tawag dito ay text blasting o kung ito ay gagawain sa internet ay spamming. Dahil sa dami ng pinapadalhang numero, gumagamit ang mga nagte-text blast ng software upang sabay-sabay na maipakalat ang mensahe at maraming mapadalhan.

At dahil uso naman ang unlimited text ngayon, hindi gaanong kalakihan ang gastos nito bagamat marami ang pinapadalhang mga numero. Efficient di ba?

Magandang gamit ito upang makapagpakalat ng tsismis, disinformation at paninira ng tao.

Nagsimula lumala ang text blasting nitong nakaraang halalan. Kung ano-anong messages ang natanggap ko mula sa magkakaibang kampo. Akala ko ay tapos na ang text spamming na ito matapos ang halalan, pero hindi pa pala.

At kung totoo mang galing sa kampo ni Binay ang text blast na ito, hindi ako naniniwalang alam niya ito.

Hindi ako naniniwalang may kinalaman sa text blast na ito si VP Jejomar Binay.

Hindi kasi ito gawain ng isang Boy Scout.

Hindi gawain ng isang Boy Scout na manira ng ibang tao o kung pupuna man ay magtatago sa likod ng isang text message. Mataas at iginagalang si Binay sa mundo ng scouting sa bansa. Katunay kamakailan lamang ay pinarangalan siya nang ipangalan ang isang Philippine Eagle bilang Scout Binay.

Ang ikalawang dahilan kung bakit hindi ako naniniwalang magagawa ito ni Binay ay dahil isa siyang fratman. Katunayan ay isa siya sa kinikilalang elder ng Alpha Phi Omega (APO) dito sa Pilipinas.

At ang mga fratmen, kung nakikipag-away, hindi dinadaan sa text. Naghahagis na lang ng granada.

So kung hindi boy scout o hindi APO ang gumagawa nito, sino?

Malamang ito ay pananabotahe sa imahe ni Binay, na sa aking pagkakaalam ay nagnanais na makamit ang pinakamataas na posisyon dito sa ating bansa.

Kaya kung ako si Binay ay lilinisn ko ang aking bakuran. Sisiguraduhin kong walang supporter o tauhang makakasira sa kanyang imahe.

Dapat din siyang mag-ingat dahil malamang ang kanyang hanay ay napasok na ng mga kaaway.

Gagong Pilipino

Isa sa mga paborito kong awitin ang Pangarap ng Balahibumpooza at kung hindi pa ninyo ito napapangkinggan ay maaaring i-click ang larawan sa itaas. Ayos ba pareng Riera? Time spacewarp, ngayon na!!!

Maliban sa tila lullaby na awitin ay hinahabi ng awiting ito ang ating mga pangarap hindi lamang sa pag-ibig kungdi ang mga ninanais nating mangyari sa ating lipunan. Wala naman sigurong Pilipino na ang pangarap ay isang maunlad, mapayapa at mapangkalingang lipunan.

Pero sabi nga ni kumpareng Riera, lahat ng ito ay pangarap lang.

Nanatili at mananatiling ganito ang ating lipunan dahil sa malalim na pagkakaugat ng kultura ng korapsyon.

Wala yatang Pilipino ang hindi nakaranas ng korapsyon dito sa Pilipinas na kung saan lahat ng bagay ay nagagawan ng paraan. Opo, ang mga Pilipino ay "maparaan."

Maparaan tayo na umiwas o kung hindi man ay tahasang sumuway sa batas. Isang simpleng halimbawa nito ay ang simpleng pagsunod sa traffic light. 

Nararanasan ko ito araw-araw lalo na rito sa kanto ng Anonas St. at V. Luna St. sa Quezon City. Walang silbi ang traffic light dito.

Walang pakialam ang mga drivers at pedestrian sa kantong ito sa traffic lights, maging ang mga pulis ay patay malisya.

Minsan nga ay napagtawanan pa ako dahil hindi ako tumawid dahil naghihintay ako ng green light, gayong malayo pa ang sasakyang patawid sa kanto.

Oo nga naman, para akong gago at naghihintay ng green light gayong hindi naman ako masasagasaan kung tatawid ako dahil napakalayo pa ng sasakyang dadaan.

Gago na kung gago, pero gusto kong sumunod sa green light eh. Hindi naman ako ambulansiyang may emergency at kailangang tumawid sa red light para makapagsalba ng buhay.

Pero ang nakakatuwa nitong Lunes ay inilunsad ang Mabuting Pilipino Movement na naglalayong tugunan ang kultura ng korapsyon sa ating bansa at himukin ang mga Pinoy na sumunod sa batas, simpleng batas man ito tulad ng pagsunod sa traffic lights hanggang sa pagbabayad ng buwis at pagtayo para sa karapatan ng bawat Pilipino.

Ah, ang sarap. Hindi pala ako nag-iisang gago sa bansang ito.

Gago rin palang tulad ko si Noel Cabangon, ang convenor ng movement, na gustong makita na ang bawat Pilipino ay hindi lamang handang bumatikos kungdi handa ring sumunod sa mga nilalayon ng batas.

Sabi nga ni Noel sa kanyang awiting Mabuting Pilipino,

Ako’y isang mabuting Pilipino
Minamahal ko ang bayan ko
Tinutupad ko ang aking mga tungkulin
Sinusunod ko ang kanyang mga alituntunin

Tumatawid ako sa tamang tawiran
Sumasakay ako sa tamang sakayan
Pumipila at ‘di nakikipag-unahan
At ‘di ako pasiga-siga sa lansangan

Ngayon ko naisip, si Merceditas Gutierrez ba ay sumusunod sa traffic lights. Eh si Gloria Macapagal-Arroyo? Naturuan kaya niya ang mga anak niyang sina Mikee at Datu na sumunod sa tamang tawiran? At ang kanyang asawang si Atty. Mike, sumusunod ba siya sa batas trapiko?

Naitanong ko ito dahil kung natuto silang sumunod sa simpleng batas trapiko, sa tingin ko ay mangingimi silang bumali sa ibang batas. 

Dagdag nga ni Noel sa kanyang awit:

Ako’y isang tapat at totoong lingkod ng bayan
Pabor o lagay ay ‘di ko pinapayagan
Tapat ang serbisyo ko sa mamamayan
‘Di ko ibinubulsa ang pera ng bayan

Punto ni Noel kung tatapusin natin ang kanyang awitin:

Ipinagtatanggol ko ang mamamayang Pilipino
Mga karapatan nila’y kinikilala ko
Iginagalang ko ang aking kapwa tao
Ipinaglalaban ko ang dangal ng bayan ko.

Ikaw, gago, este, Mabuting Pilipino ka ba?